മലയാളം മാഷ് 

   "  മലയാളം മാഷ് " സദാ ടീച്ചർമാർക്ക് , കുട്ടികൾക്ക് , രക്ഷിതാക്കൾക്ക് , സഹൃദയന്മാർക്ക് , ഭാഷാകുതുകികൾക്ക് ...ഒരു സഹായമായി, സൌജന്യമായി നില നില്ക്കും.        മലയാളം മാഷ് ബ്ലോഗിലുള്ള പാഠങ്ങൾ , അവയുടെ അവതരണം , സജ്ജമാക്കിയിട്ടുള്ള പഠനബോധനസഹായികൾ  .... മുതലായവയിൽ    കാലികമായ , ഗുണകരമായ എന്തെങ്കിലും മാറ്റം ആവശ്യമാണോ ?    എന്തെങ്കിലും മാറ്റം ആവശ്യമെങ്കിൽ 9446612400 എന്ന വാട്ട്സപ്പ് നമ്പറിലോ      jenumash@gmail.com എന്ന ഈ മെയിലിലോ അറിയിക്കുമെന്നു കരുതുന്നു  .ജനുമാഷ് 

  ഐ സി എസ് ഇ  പാഠ്യപദ്ധതി 

 മലയാളം മാഷ് 2022

 

       കേരളത്തിലങ്ങോളമിങ്ങോളം  സംസ്ഥാന പാഠ്യപദ്ധതിയോടൊപ്പം  ഐ സി എസ് ഇ , സി ബി എസ് ഇ  പാഠ്യപദ്ധതികളും നിലനില്ക്കുന്നുണ്ട്. അത്തരം സ്ഥാപനങ്ങളിലെ വിദ്യാർത്ഥികൾക്കു കൂടി ഉപകാരപ്പെടുന്ന രീതിയിൽ മലയാളം മാഷ് ബ്ളോഗിൽ ആവശ്യമായ ക്രമീകരണങ്ങൾ  ഉടൻ നടപ്പിലാക്കുന്നതാണ്   . മലയാളം മാഷിന്റെ ഉദ്ദേശ്യം ഭാഷാപഠനം ആസ്വാദ്യമാക്കുക എന്നുള്ളതാണ് . വിദ്യാർത്ഥികളുടെ , അദ്ധ്യാപകരുടെ പൊതുജനങ്ങളുടെ നിസ്സീമമായ സഹകരണം തുടർന്നും പ്രതീക്ഷിക്കുന്നു.

 മലയാളം മാഷ് 

               മലയാളം മാഷ് ബ്ലോഗ് നിലവിൽ ശ്രദ്ധയൂന്നുന്നത് കേരള സംസ്ഥാനസിലബസ്സിൽ പഠിച്ചു വരുന്ന വിദ്യാർത്ഥികളേയും അവരുമായി ബന്ധപ്പെടുന്ന പൊതുസമൂഹത്തേയുമാണ് . അടുത്തിടെ സി ബി എസ് ഇ കലോൽസവവുമായി ബന്ധപ്പെട്ട്  ഒരു സമീപജില്ലയിൽ  ചെന്നപ്പോഴാണ്  ആ വിദ്യാർത്ഥികൾ നേരിടുന്ന പ്രയാസം ശ്രദ്ധയില്പ്പെട്ടത് .

                    "മൂസ്സാമ്പൂരിമാർക്കിടയിൽപ്പെട്ട അപ്ഫനെപ്പോലെ " ഒതുങ്ങിപ്പോകേണ്ടി വരുന്ന "മലയാളം"  . അവിടെ പരിചയപ്പെട്ട ചില വിദ്യാർത്ഥികളാണ്  മലയാളം മാഷിനെ സി ബി എസ് ഇ    സിലബസ്സിലേക്കു കടന്നു ചെല്ലാൻ പ്രേരിപ്പിച്ചത്  .അവർക്കൊരു  സഹായമെന്ന നിലയിൽ നിലവിലുള്ള സി ബി എസ് ഇ പാഠ്യപദ്ധതിയനുസരിച്ചുള്ള  പാഠങ്ങളും അവ വിനിമയം ചെയ്യാനാവശ്യമായ പഠന ബോധനസാമഗ്രികളും മലയാളം മാഷിൽ ഉൾപ്പെടുത്താനുള്ള ശ്രമം ആരംഭിച്ചിരിക്കുന്നു എന്ന വിവരം സസന്തോഷം പങ്കു വയ്ക്കുന്നു.

                           ഏവരുടേയും   സഹായസഹകരണങ്ങൾ തുടർന്നും പ്രതീക്ഷിക്കുന്നു.                                                                      ജനുമാഷ്

വൃഷ്ടിമാസങ്ങൾ

 "എട്ടുമാസവും പ്രവർത്തിക്കിലേ പുനരതി-

വൃഷ്‌ടിമാസങ്ങൾ നാലും സുഖമായ്‌ വസിക്കാവൂ.

യൗവനത്തിങ്കൽ പ്രവർത്തിച്ചർത്ഥമാർജ്ജിക്കിലേ

ചൊവ്വോടേ വാർദ്ധക്യത്തിൽ സുഖിച്ചുവസിക്കാവൂ.

ജീവപര്യന്തം പ്രവർത്തിക്കിലേ മരിച്ചാലും

ദേവലോകാദികളിൽ സ്വൈരമായ്  വസിക്കാവൂ."

              എഴുത്തച്ഛന്റെ മഹാഭാരതത്തിലെ വിദുരവാക്യം . മനുഷ്യശിശു- പ്രപഞ്ചത്തിൽ ഏതു ജീവജാലവുമായി താരതമ്യം ചെയ്താലും ഏറ്റവും നീണ്ട നിസ്സഹായാവസ്ഥയുള്ള ജീവി. ഏറ്റവുമധികം  പരാശ്രയം വേണ്ടവൻ . ഏറ്റവുമധികം കർമ്മശേഷിയുള്ളവൾ. ഏറ്റവുമധികം സാദ്ധ്യതകളുള്ളവർ . ഈ നീണ്ട പരാശ്രയകാലം  നാളേയ്ക്കുള്ള തയ്യാറെടുപ്പിനുപയോഗിക്കണം . അദ്ധ്വാനിക്കാനവസരമുള്ള എട്ടു മാസവും ജോലി ചെയ്താലേ നാലുമാസം നീളുന്ന മഴക്കാലം സ്വസ്ഥമായിക്കഴിയാനാകൂ. ആരോഗ്യവും ഉൽസാഹവുമുള്ള യൌവ്വനകാലം നന്നായി അദ്ധ്വാനിച്ച് അർത്ഥം നേടിയാലേ വാർദ്ധക്യം അല്ലലില്ലാത്തതാകൂ . ആയുഷ്ക്കാലം മൊത്തം ധർമ്മനിരതനായി കർമ്മം ചെയ്താലേ  സ്വൈരമായ പരലോകങ്ങളുണ്ടാകൂ .നാളെകൾ....  സുഖമാകണമെങ്കിൽ ഇന്ന് നന്നായി അദ്ധ്വാനിച്ചേ പറ്റൂ. 

           നമുക്കിതു മഴക്കാലം .ജില്ലാകലക്ടർ അവധി പ്രഖ്യാപിക്കുന്നത് സംഭവിക്കാനിടയുള്ള  കഷ്ടനഷ്ടങ്ങളുടെ വലിപ്പം കുറയ്ക്കാനാണ്. ക്ലാസ്സിൽ ചെന്നു പഠിക്കുന്നതിലെത്രയോ കൂടുതൽ ഇന്നത്തെക്കാലം നമുക്കു വീട്ടിലിരുന്നു പഠിക്കാം. അതിനുള്ള മനസ്സു വേണമെന്നു മാത്രം .

 കടമ്മനിട്ട പാടിയതു പോലെ .....കണ്ണിലെപ്പൊഴും കത്തിജ്വലിക്കുമുൾ

                                           ക്കണ്ണു വേണമണയാത്ത കണ്ണ്. "                                           കണ്ണൂ തുറന്നു നോക്കിയാൽ "മലയാളം മാഷ് "ബ്ലോഗ് കണ്മുന്നിലെത്തും "malayalamjenumash.blogspot.com " ഏവർക്കും വായനയുടെ പഠനത്തിന്റെ സമൃദ്ധവർഷം ആശംസിക്കുന്നു.

 പുതുവിദ്യാലയവർഷത്തിലേക്ക്  സുസ്വാഗതം

മലയാളം പഠിക്കാൻ ..ആസ്വദിക്കാൻ ...പഠിപ്പിക്കാൻ... ഒരു സമ്പൂർണ്ണ ബ്ലോഗ് .മലയാളം മാഷ്  "malayalamjenumash.blogspot.com "

വരുന്നൂ ഒരു പുതുവർഷം കൂടി

================================

 കോവിഡ് കാലം ഒരു കടങ്കഥ പോലെ കടന്നു പോയി .ആശങ്കകളും ആവലാതികളുമില്ലാതെ ഒരു പുതു വിദ്യാഭ്യാസവർഷം കണ്മുന്നിൽ.അദ്ധ്യാപകമുഖത്തു നിന്നു കിട്ടേണ്ടിയിരുന്ന  പല ജ്ഞാനശകലങ്ങളും സ്വയം നേടിയെടുക്കാൻ "മലയാളം മാഷ് " നിങ്ങളെ സഹായിക്കും. അദ്ധ്യാപകർ കൈ പിടിച്ചെത്തിക്കുന്നതിനു മുന്നേ തന്നെ പാഠങ്ങളിലൂടെ,  പാഠം വന്ന പുസ്തകത്തിലൂടെ, ഗ്രന്ഥകാരന്റെ ഇതരകൃതികളിലൂടെ ഒരോട്ടപ്രദക്ഷിണം നല്ലതാണ്. മലയാളം മാഷ് ബ്ലോഗിലെ ഓരോ പവർ പോയന്റ് അവതരണവും അധിക പഠനസാമഗ്രികളും  ഈ ലക്ഷ്യം മുന്നില്ക്കണ്ടു തയ്യാറാക്കിയതാണ്. 

                  പാഠവുമായി ബന്ധപ്പെട്ട , ഭാഷയുമായി ബന്ധപ്പെട്ട സംശയങ്ങൾ പരിഹരിക്കാൻ സാധ്യമായതെല്ലാം ചെയ്യുന്നതാണ്. 9446612400 എന്ന് വാട്ടസപ്പ് നമ്പറിലോ ടെലഗ്രാമിലോ jenumash@gmail.com  എന്ന് ഇ മെയിലിലോ സംശയങ്ങളും നിർദ്ദേശങ്ങളും  അറിയിക്കാവുന്നതാണ്. 

     ഒരു ദിവസത്തെ പത്രത്തിൽ നിന്ന് സാഹിത്യസംബന്ധിയായ ഒരു ചോദ്യം മാത്രം . എ കെ ജി സ്മാരക പൊതുജനവായനശാല, സ്മാർട്ട് പയ്യന്നൂരിലെ കെ ടെറ്റ്   പരിശീലന സ്ഥാപനമായ സ്മാർട്ട് പയ്യന്നൂർ  (https://t.me/smartpayyanur) എന്നീ ടെലഗ്രാം ഗ്രൂപ്പിൽ നിത്യേന നല്കുന്ന ഒരു ചോദ്യം " മലയാളം മാഷ് ബ്ലോഗിലും നല്കുന്നതാണ് ."പലവക "  പേജിൽ ഇതു കാണാവുന്നതാണ്. ഒത്തു ചേർന്നു വളരാൻ ഏവരേയും സഹർഷം ക്ഷണിക്കുന്നു.  malayalamjenumash.blogspot.com.